Чолпон-Ата шаарында 4-май күнү Кыргыз Республикасынын Президентине караштуу Виртуалдык активдер жана блокчейн-технологиялар чөйрөсүн өнүктүрүү боюнча улуттук кеңештин биринчи отуруму болуп өттү.
Ага өлкө башчысы Садыр Жапаров, Инвестиция боюнча улуттук агенттиктин директору Фархат Иминов, Binance компаниясынын негиздөөчүсү Чанпэн Чжао, аталган компаниянын Борбор Азия боюнча өкүлү Кирилл Хомяков жана башкалар катышты.
Жолугушуунун жүрүшүндө Binance компаниясы менен Инвестиция боюнча улуттук агенттиктин ортосунда кызматташуу боюнча меморандумга кол коюлду.
«Биз Binance менен бул стратегиялык өнөктөштүктү баштап жатканыбызга кубанычтабыз. Бул кадам Кыргызстандагы криптоактивдер секторунун өнүгүшүндө маанилүү этап болуп эсептелет. Бул кызматташтык биз инновациялар менен экономикалык өсүштү колдоого берилгендигибизди гана эмес, бүгүнкү күндөгү глобалдык экономикада санариптик трансформацияны киргизүүнүн маанилүүлүгүн дагы баса белгилейт. Биз биргелешип криптоактивдерди өнүктүрүүгө көмөк көрсөткөн, каржылык сабаттуулукту жогорулаткан жана чек аралык төлөмдөр үчүн жаңы мүмкүнчүлүктөрдү ачкан ишенимдүү түзүмдү түзүүгө умтулабыз, бул акыры биздин жарандарга жана бүтүндөй регионго пайда алып келет» — деди Фархат Иминов.
«Биз Binance компаниясы Кыргызстандын Улуттук инвестициялар агенттиги менен стратегиялык кызматташтыкты өнүктүрүп жатканыбызга сыймыктанабыз. Бул кызматташтыктын максаты — өлкөдө жана бүткүл региондо криптоактивдерди өнүктүрүүгө өбөлгө түзүү. Бул өз ара түшүнүшүү боюнча Меморандум блокчейн технологиясын колдонуу аркылуу туруктуу экономикалык мүмкүнчүлүктөрдү түзүүгө, заманбап технологияларга жеткиликтүүлүктү камсыздоого жана каржылык эркиндикке жетүүгө болгон жалпы көз карашыбызды чагылдырат. Биз Кыргызстандагы өнөктөштөрүбүз менен тыгыз кызматташтыкта иштеп, институционалдык кардарлардан тарта ар бир жаранга чейин мүмкүнчүлүктөрдү кеңейткен инновациялык чечимдерди жана билим берүү демилгелерин ишке ашырууну чыдамсыздык менен күтөбүз», — деди Кирилл Хомяков.
Binance тууралуу
Binance — бул дүйнө жүзү боюнча эң ири криптовалюта биржасынын жана блокчейн экосистемасынын лидери. Binance платформасына 260 миллиондон ашуун адам ишенет жана аны 100дөн ашык өлкөлөрдө колдонушат. Бул ишеним компаниянын коопсуздуктун жогорку деңгээли, ачык-айкын иш алып баруусу, соода кыймылдаткычынын ылдамдыгы, инвесторлорду коргоо чаралары жана санариптик активдерди соодадан баштап билим берүү, изилдөөлөр, социалдык долбоорлор, төлөмдөр, институционалдык кызматтар жана Web3 функцияларына чейин камтыган өнүмдөрүнүн жана кызматтарынын кеңири портфели менен байланыштуу. Binance компаниясы дүйнө жүзүндөгү адамдар үчүн каржылык мүмкүнчүлүктү жана акчанын эркиндигин кеңейтүү максатында криптовалютаны негизги курал катары колдонуп, инклюзивдүү криптоэкосистеманы түзүүгө умтулат.