Президенти Садыр Жапаров 9-майда Россия Федерациясынын Президенти Владимир Путиндин чакыруусу менен Улуу Ата Мекендик согуштагы Жеңиштин 80 жылдыгына арналган салтанаттуу иш-чараларга катышуу үчүн Москва шаарында жүрөт.
Мамлекет башчы 8-май күнү «Внуково-2» эл аралык аэропортуна келип конгон. Аны Россия Федерациясынын Тышкы иштер министринин орун басары Александр Панкин тосуп алган.
Президент Садыр Жапаровго 1945-жылдын 9-майында жарык көргөн «Кызыл Кыргызстан» жана «Правда» гезиттеринин Улуу Жеңиш тууралуу алгачкы расмий билдирүүлөр басылган тарыхый сандарынын көчүрмөлөрү тапшырылды.
Эске сала кетсек, бүгүн, 9-майда, Садыр Жапаров башка мамлекеттердин жана өкмөттөрдүн башчылары менен бирге Москва шаарындагы Кызыл аянтта өтүп жаткан юбилейлик Жеңиш парадына катышууда.
Салтанаттуу иш-чарага Кыргыз Республикасынын Куралдуу Күчтөрүнүн Улуттук гвардиясынын Параддык бөлүгү да катышууда.