Президент Садыр Жапаров Ташиевдердин үй-бүлөсү мунай базасын сатып, анын ордуна мамлекетке төрөт үйүн куруп бергенин билдирди. Бул тууралуу ал 13-майда Сузак районундагы Чокмор айылындагы жаңы төрөт үйүнүн ачылышында сүйлөп жатып айтты.
«Мурун чиновниктер менен байлар акчаларын чет өлкөгө чыгарып, ошол жактан үй салып, бизнес ачып кетишчү. Азыр деле кайтып келе албай жүргөндөр бар. Ал эми Ташиевдер үй-бүлөсү мунай базасын сатып, ошол акчаны өз элине жумшап, ушул ооруканадай изги ишке салды. Бул — чыныгы үлгү, чыныгы патриотизм»-
деген Жапаров.
Маалым болгондой, жаңы төрөт үйү 75 орундуу төрөт бөлүмү жана 75 бала ылайыкташкан оорукана курууга 570 миллион сом каражат сарпталган.
Ага Улуттук коопсуздук комитетинин төрагасы Камчыбек Ташиевдин апасы Алийма Ташиеванын ысымы ыйгарылган.