4-июнда Жогорку Кеңеш Жер кодексинин жаңы редакциясын талкуусуз кабыл алды. Документти буга чейин президент Садыр Жапаров «жеке менчикке кол тийбестик бузулушу мүмкүн» деген негизде артка кайтарган.
Президент ошондой эле жер мамлекеттик муктаждык үчүн алынганда, жер ээси компенсация алышы керектигин белгилеген.
Жумушчу топ кодексти кайра иштеп чыгып, ал парламенттин тиешелүү комитеттеринде колдоо тапты. Ошондон кийин мыйзам кайра добушка коюлуп, кабыл алынды.
Эске салсак, мурунку версияга каршы өлкөдө бир катар нааразылык акциялары өткөн. Жарандар менчикке кол тийбестикти сактоону талап кылып, президентке мыйзамга кол койбоо өтүнүчү менен кайрылышкан.