30 жаштагы Табылды Муратбеков Жогорку Кеңешке “Ыйман нуру” партиясынын тизмеси боюнча депутат болду. Тиешелүү чечим Борбордук шайлоо комиссиясынын (БШК) 5-июндагы жыйынында кабыл алынды.
Муратбеков партиянын тизмесинде мандатынан ажыратылган Султанбай Айжигитовдон кийин турган.
Ал 1994-жылы 10-ноябрда Ысык-Көл облусунун Түп районунда туулган. 2016-жылы Баласагын атындагы Кыргыз улуттук университетин аяктаган. 2020–2021-жылдары өкмөттүн Ысык-Көл облусундагы ыйгарым укуктуу өкүлүнүн жардамчысы, андан кийин Региондорду өнүктүрүү боюнча мамлекеттик агенттиктин жетектөөчү адиси болуп иштеген.
Тактап кетсек, Табылды Муратбеков 2021-жылкы парламенттик шайлоодо “Ыйман нуру” партиясынын тизмесинде 5-орунда турган жана шайлоо учурунда 2 миңге жакын добуш алган.
Жаңы депутатка күбөлүк жана төш белгини БШК төрагасы Тынчтык Шайназаров тапшырды.