Венгриянын премьер-министри Виктор Орбан Франциянын LCI телеканалына берген маегинде Украина, Орусия жана Европа коопсуздугуна байланыштуу бир катар маанилүү билдирүүлөрдү жасады.
Европада Орусияга жакын позициясы менен таанылган Орбан бул жолу күтүүсүз билдирүү жасап, Орусиянын Украинадагы аракеттерине сын айткан.
«Орустар НАТОго кол сала албайт. Алар жада калса Украинаны да жеңе албай жатышат», — деди ал.
Орбандын айтымында, Украина өзүнүн аймактык бүтүндүгүн коргоого укуктуу жана бул багытта баатырдык менен аракеттенип жатат. Ал ошондой эле:
«Орустар күчтөн башка эч нерсени түшүнүшпөйт, ошондуктан Европа да күчтүү болушу керек», — деп билдирди.
Ошол эле маалда Орбан Украинанын Европа Биримдигине жана НАТОго кошулуу мүмкүнчүлүгүнө каршы экенин билдирди. Анын пикиринде, бул кадамдар согуштук чыңалууну ого бетер күчөтүшү мүмкүн.
Мындан сырткары, ал Орусияга каршы киргизилген санкциялар Евробиримдиктин өзүнө зыян келтирип жатканын айтып, аларды кайра карап чыгууга чакырды.
Орбандын бул маеги Европада ар кыл реакция жаратты. Айрым байкоочулар анын коопсуздук жаатындагы позициясында өзгөрүүлөр байкалып жатканын белгилешет.