Кыргызстанда 2025-жылдын январь-апрель айларында орточо номиналдык эмгек акы 40 миң 776 сомду түздү. Бул тууралуу Бишкекте өткөн брифингде Улуттук статистикалык комитеттин төрагасынын орун басары Бакытбек Шокенов маалымдады.
Анын айтымында, эмгек акы 2024-жылдын ушул мезгилине салыштырмалуу 18,6%га өскөн.
Бакытбек Шокеновдун билдирүүсүнө караганда, айлык акынын эң көп өсүшү кыймылсыз мүлк менен операциялар, курулуш, саламаттыкты сактоо, маалымат жана байланыш, калкка социалдык кызмат көрсөтүү, кесиптик, илимий-техникалык ишмердүүлүк, ресторан жана кафе чөйрөсүндө, финансылык ортомчулук жана камсыздандыруу сыяктуу тармактарда катталган.