13-июнда Жалал-абад облусунун Сузак районунда 2010-жылдагы Июнь окуясынын 15 жылдыгы эскерилди. Бул тууралуу президенттин аталган облустагы өкүлчүлүгү билдирди.
Маалыматка ылайык, ага президенттин өкүлүнүн орун басары Урматбек Самаев, Сузак районунун акими Баратбек Сыдыкназаров, шаар мэри Эрнисбек Ормоков, Базар-Коргон районунун акими Талантбек Эдилов, Жалал-Абад облусунун казысы Нематулла ажы Жээнбеков, окуяда каза болгон жарандардын жакындары жана мекеме-ишкана жетекчилери катышты.
Иш-чарада облус башчысынын орун басары Урматбек Самаев окуяда каза болгондордун жакындарына көңүл айтып, өлкөдөгү улуттар арасындагы достуктун, бири-бирине болгон сый-урмат жана ишенимдин бекемделиши маанилүү экенин кошумчалады.
Эске салсак, 2010-жылдагы Июнь окуясында Жалал-Абад облусунда 592 адам жаракат алып, 82 жаран каза болгон. Төрт адам дайынсыз жоголгон.