Трамп Жакынкы Чыгышта тутанган куралдуу жаңжалды 14-июнда Путин менен телефондон бир саатча талкуулаганын билдирди.
«Путин мени туулган күнүм менен куттуктап чалыптыр. Ал жакшы билген Иран маселесин кенен талкуулап, Израил-Иран чатагы токтотулушу керек деген пикирге ынандык. Ошол эле учурда анын (Путиндин) согушу да аякташы керектигин түшүндүрдүм», — деп жазды Трамп.
Буга чейин Кремлдин тышкы саясат боюнча кеңешчиси Юрий Ушаков Орусиянын президенти Израилдин Иранга чабуулун айыптап, куралдуу эрегиш андан ары кеңейип кетиши мүмкүн деп эскерткенин билдирген.
15-июнда Оманда өтөрү белгиленген Иран-АКШ сүйлөшүүлөрү куралдуу чабуулдар башталган үчүн болбой турганы билдирилген.
Белгилей кетсек, 14-июнда АКШ президенти 79 жашка толду. Ал күнү Вашингтондо АКШ армиясынын түзүлгөнүнүн 250 жылдыгына арналган аскердик парад өттү. Бир катар штаттарда «Падыша болбосун» деген ураандын астында оппозициячыл демонстрациялар уюшулду.