Төлөмүш Океев атындагы улуттук «Кыргызфильм» киностудиясы улуу мамлекеттик ишмер Жусуп Абдрахмановдун өмүрүнө жана мурасына арналган «Жусуп» аттуу толук метраждуу тарыхый-драмалык тасманын тартуусун баштады. Бул тууралуу киностудиянын басма сөз кызматынан кабарлашты.
Фильмде Абдрахмановдун татаал тагдыры, Кыргыз мамлекеттүүлүгүнүн пайдубалын түптөөдөгү чечүүчү ролу жана анын улуттук идеяларга берилгендиги чагылдырылат. Долбоордун негизги максаты — кыргыз тарыхындагы маанилүү барактарды жаңы муунга жеткирүү жана мекенчилдик рухун даңазалоо.
Тасманын режиссёру — Кыргыз Республикасынын Маданиятынын эмгек сиңирген ишмери, кинематографисттер союзунун төрагасы Таалайбек Кулмендеев. Азыркы тапта даярдык иштери жүрүп, ролдорго кастинг жана тартуу локацияларын аныктоо процесси уланууда.
Сүрөт тартуу иштери Москва, Санкт-Петербург, Ташкент шаарларында жана Кыргызстандын бир катар аймактарында өткөрүлөт.
«Жусуп» тасмасынын бет ачары 2026-жылдын 25-августуна белгиленип, ал Кыргызстандын Көз карандысыздыгынын 35 жылдыгына, Кыргыз АССРинин 100 жылдыгына жана Жусуп Абдрахмановдун 125 жылдык мааракесине арналат.