Бириккен Улуттар Уюмунун баш катчысы Антониу Гутерриш АКШнын Ирандын өзөктүк объектилерине сокку урганын “кооптуу эскалация” деп атады.
Антониу Гуттериштин айтымында, учурда “чыр-чатак тез арада көзөмөлдөн чыгып кетип, жайкын тургундарга, аймакка жана жалпы дүйнөгө оор кесепеттерди алып келиши мүмкүн болгон тобокелдик өсүп жатат”.
Ал Х социалдык тармагындагы баракчасына: “Бул кооптуу учурда башаламандык айлампасына түшүп кетүүдөн сактануу өтө маанилүү. Аскердик чечим жок. Жалгыз жол – дипломатия. Жалгыз үмүт – тынчтык»,-деп жазды.
Мунун алдында Трамп АКШ Ирандын үч өзөктүк объектисине – Фордо, Натанз жана Исфаханга сокку урганын билдирген.
Axios басылмасы булактарына таянып, АКШ Иранга сокку урууга камынып жатканын Израилге алдын ала билдирген. Израилдик жогорку кызмат адамы басылмага бул соккулар үчүн B-2 бомбалоочу учактары колдонулганын айткан.
Ирандын расмий өкүлдөрү да абадан сокку урулганын билдиришкен.