Бүгүн, 23-июнда Министрлер кабинетинин төрагасы Адылбек Касымалиев иш сапары менен Кытай Эл Республикасынын Тяньцзинь шаарына барат. Бул тууралуу өкмөттүн басма сөз кызматы билдирди.
Маалыматка ылайык, өкмөт башчы «Жайкы Давос 2025» Дүйнөлүк экономикалык форумунун жылдык жыйынына катышат.
Форум «Жаңы доордогу ишкердик» деген ураан астында өткөрүлүп, ага дүйнөнүн 90дон ашуун өлкөнүн жана аймактарынан 2 миңге жакын катышуучу келет.
Иш сапарынын алкагында Адылбек Касымалиев Кытайдын Мамлекеттик кеңешинин жетекчилиги жана чет элдик делегациялардын башчылары менен бир катар эки тараптуу жолугушууларды өткөрөт.