Министрлер Кабинетинин төрагасы Адылбек Касымалиев Кытай Эл Республикасынын Тяньцзинь шаарына жумуш сапары менен барды.
Адылбек Касымалиев “Жайкы Давос -2025” Дүйнөлүк экономикалык форумунун жылдык жыйынына катышат.
“Жаңы доордогу ишкердик” деген ураан астында форумга дүйнөнүн 90дон ашуун өлкөдөн жана аймактарынан 2 миңге жакын катышуучу келет. Адылбек Касымалиев панелдик сессияда “Бир алкак, бир жол” демилгеси кайда баратат?” – деген темада сөз сүйлөйт.
Форумдун алкагында Министрлер Кабинетинин төрагасы Адылбек Касымалиев Кытай Эл Республикасынын Мамлекеттик кеңешинин премьери Ли Цян, Вьетнам Социалисттик Республикасынын премьер-министри Фам Минь Тинь менен эки тараптуу жолугушууларды өткөрөт. Ошондой эле, жумуш сапардын алкагында бир катар ишканалардын жана уюмдардын жетекчилери менен жолугушуулары да пландалууда.