- Баткен
Облустагы аскер бөлүгүндө чек арачыларга кызматтык квартиралардын ачкычын тапшыруу салтанаты болду. Бул квартираларды куруу 2022-жылы башталган. Мурда аскер бөлүгүндө 80 квартира болсо, ага 60 квартира кошулуп, жалпы 140ты
түздү.
- Зардалы
Данги капчыгайы аркылуу кеткен Кызыл-Таш – Зардалы жолунун курулушу жүрүүдө. Азыркы тапта 9 чакырым жолдун 8 чакырымы бүтүп калды. Капчыгайда жүк көтөрүмдүүлүгү 90 тонна көпүрө салынат жана эки тилкелүү жол болот. Азыркы учурда транспорт менен Кызыл-Таш айылына гана барууга болот.
- Өзгөн
Райондун Дөң-Булак айылынын аймагында Өзгөн-Чымбай унаа жолунун беш чакырымы асфальт-талып, ишке берилди. Айтымда бул жол менен Кара-Кулжа районуна барууга болот.
- Ош шаары
Шаардагы Алишер Навои жана Курманжан датка көчөлөрүнүн кесилишине ойчул жана акын Алишер Навоинин эстелиги орнотулат.
- Алай
Гүлчө айылында Алымбек датка атындагы паркты реконструкциялоо аягына чыгып калды. Учурда эски конструкциялар демонтаждалууда. Парктын реконс-
трукциясына 20 млн. сом каражат каралган.
- Ак-Талаа
Тоголок Молдо айыл аймагындагы Ак-Тал айылында жаңы мектептин курулушу аяктады. Эске салсак, Аскар Турдакунов атындагы мектептин биринчи корпусу 1965-жылы, экинчи корпусу 1987-жылы курулуп, жаан жааганда чатырынан суу агып, жерпайы отуруп, дубалынан жарака кетип калган болчу.
- Баетов
Баетов айылында 240 орунга эсептелген жаңы бала бакчанын курулушу башталды. Долбоордун сметалык баасы 176 млн. сомду түзүп, республикалык бюджеттен каржыланмакчы.
Курулушту аяктоо 2026-жылдын ноябрь айына белгиленген.
- Талас
Талас шаарын өнүктүрүүнүн 2045-жылга чейинки башкы планы коомдук талкуудан өттү. Анын жүрүшүндө коомчулуктун өкүлдөрү тарабынан кошумча сунуштар айтылды.
- Кайыңды
Коммерциялык объекттер үчүн бирдиктүү дизайн код киргизилди.
Болотбек ТАШТАНАЛИЕВ,
«Кыргыз Туусу»