Тышкы иштер министри Жээнбек Кулубаевдин чакыруусу менен Орусиянын тышкы иштер министри Сергей Лавров 28-29-июнь күндөрү Кыргызстанга расмий сапар менен келет. Эки өлкөнүн тышкы саясат жетекчилери Кыргызстан менен Орусиянын алакасы тууралуу сүйлөшүү өткөрөрү кабарланды.
Сергей Лавров президент Садыр Жапаровдун да кабыл алуусунда болорун Орусиянын Тышкы иштер министрлигинин өкүлү Мария Захарова билдирген.
Тышкы иштер министрлигинин маалыматында, 2025-жылдын январына карата 608 миң 88 чет өлкөлөрдө миграцияда жүргөн кыргызстандык жарандардын ичинен 376 миң 907 адам Орусияда миграциялык каттоого алынган.
Эске салсак, быйыл 5-февралда Орусияда жаңы укуктук режим кирген. Ага ылайык, Орусиянын аймагында жүрүүгө, жашоого мыйзамдуу негизи жок чет элдиктер өлкөнүн аймагынан кетүүгө тийиш. Ички иштер органдары чет өлкөлүк жарандарды айрым укук бузуулар үчүн Орусиядан депортациялоого укуктуу болот.