Кыргызстандын Орусиядагы элчиси Кубанычбек Бөкөнтаев өлкөгө кирүүнүн жаңы эрежелерди сыноо боюнча эксперименттин экинчи этабында колдонулуп жаткан RUID мобилдик тиркемесин ишке киргизүү боюнча билдирүү жасады. Бул тууралуу элчиликтен билдиришти.
Дипломаттын айтымында, Россия тараптап алынган акыркы маалыматка ылайык, RUID тиркемеси аркылуу 72 саат мурун билдирүү жиберүү азырынча ыктыярдуу түрдө жүргүзүлөт.
«Бирок аталган тиркемени алдын-ала толтуруп келсеңиздер, Россияга келгенде телефонго SIM-карта, СНИЛС жана башка документтерди алууда убаракерчилик азаят.
«RUID тиркемесин толтурбай келипсиң» деген негиз менен чек арадан киргизбей койбойт. Эң башкысы — «кара тизмеде» же «көзөмөлдөөчү реестрде» болбошуңуз шарт. Эгерде, аталган тизмелерде болуп калсаңыз, анда Россиянын аймагына кире албай каласыз.
RUID тиркемесин элчиликтин кызматкерлери текшерип көрүштү. Бирок тиркемени толтурууда кыйынчылыктар болууда. Россия тараптын маалыматы боюнча, бул тиркеме жаңы иштелип чыккандыгына байланыштуу, мүчүлүштүктөр болуп жаткандыгын тастыкташты жана жакын арада алар жоюлат деп ишендиришти», — деп айтылат элчинин кайрылуусунда.