Өткөн жуманын этегинде укук коргоо органдарынын облустук кеңешинин координациялык жыйыны болуп, облуста жол курулуш иштеринин жүрүшү, кум, шагылдарды казууга карьерлерди лицензиялоонун мыйзамдуулугу маселелери каралды.
Жыйынга облустагы укук коргоо тармагынын жетекчилери, облустук мекеме уюмдардын жетекчилери, район, шаардын жетекчилери катышты. Эң оболу, Талас шаарындагы тротуарлардын курулушу неге создугуп жатат, деги кайсыл убакта сапаттуу, өз мөөнөтүндө аяктайт деген маселе коюлду. Шаар бийлигинин өкүлдөрү демейдегидей эле өз мөөнөтүндө бүтөт деген жоопторун айтышты. Координациялык Кеңеш убаданын негизинде чечим кабыл алып, иштин 50 пайызын 15-июлга чейин, толук бүткөрүүнү июль айында аяктоо тууралуу протоколго жазышты. Жол курулуштун сапаттуу жүргүзүлүшүн жана республикалык бюджеттен бөлүнгөн 300 млн. сомдук каражаттын максаттуу, натыйжалуу, мыйзамдуу жумшалышын катуу көзөмөлгө алуу боюнча укук коргоо органдарына тапшырма берилди.
Жыйында Талас шаарындагы 52 чакырым тротуарды куруу боюнча 8 фирма иштеп жаткандыгы айтылды. Бирок иш ыкчамыраак, жигердүү жүрбөй жатканы да иликтөөгө алынышы керек деген жүйөлүү маселе козголду. Ошону менен Министрлер Кабинетинин Төрагасынын орун басары, УКМКнын жетекчиси Камчыбек Ташиев жакынкы күндөрү Таласка иш сапары менен келет деген кабар тараган соң, Таласта иш бир топ жасала баштагандай.
Козубек ИМАНКУЛОВ, «Кыргыз Туусу»