Өзбекстанда, Тажикстанда жана Кыргызстанда Шанхай кызматташтык уюмунун жаңы борборлору ачылат. Бул тууралуу Орусиянын тышкы иштер министри Сергей Лавров Пекинде өткөн ШКУнун ТИМ жетекчилеринин отурумунан кийинки маалымат жыйында маалымдады.
Ал Бишкекте уюшкан кылмыштуулукка каршы иш алып барган ШКУнун түзүмү пайда болорун айтты. Андан сырткары, Ташкентте (аймактагы террорчулукка каршы борбордун негизинде) көйгөйлөргө жана кооптуулуктарга каршы күрөшүү максатындагы макулдашуулардын долбоору дээрлик даяр болуп калганын кошумчалады.
Андан сырткары, Дүйшөмбү шаарында ШКУнун баңгизаттарга каршы иштеген борборун түптөө иштери да соңуна чыгып бара жатканын белгиледи.
«Бул үч механизм реформадан кийин террордук коркунучтарга жана мыйзамсыз миграция менен байланышкан көйгөйлөргө каршы натыйжалуу күрөшүү үчүн кошумча мүмкүнчүлүктөрдү түзөт», — деди Лавров.