Дональд Трамп Америка Кошмо Штаттарын Бириккен Улуттар Уюмунун Билим, илим жана маданият боюнча мекемесинен (ЮНЕСКО) чыгаруу чечимин кабыл алды. Бул тууралуу АКШнын Мамлекеттик департаменти билдирди.
Чечим Трамп администрациясынын 90 күндүк текшерүүсүнөн кийин кабыл алынды. Ак үйдүн өкүлдөрү ЮНЕСКОнун саясатын «антиамерикалык», «антиизраилдик» жана «кытай тараптык» деп баалашкан. Мындан сырткары, алар уюмду коомду бөлүп-жарган жана АКШнын улуттук кызыкчылыктарына каршы чыккан программаларды колдоп жатат деп айыпташты.
Ак үй ЮНЕСКОнун расизмге каршы күрөш, гендердик теңчилик жана инклюзия боюнча иш-аракеттерин сындап, мунун баарын «акылга сыйбагандык» деп атады. ЮНЕСКО мүчөлүгүнөн чыгуу чечими жакын арада расмий жарыяланары күтүлүүдө.
Бириккен Улуттар Уюмунун Билим, илим жана маданият боюнча мекемеси (ЮНЕСКО) 1945-жылы 16-ноябрда түзүлгөн.