Президенттин маалымат кызматынын жетекчиси Дайырбек Орунбеков социалдык тармактагы баракчасында Чолпон-Ата жана Бостериде туризм менен алектенгендерге кайрылып, меймандостукту биринчи орунга коюуга чакырды.
«Президенттин тапшырмасы менен көл жээгиндеги тосмолор алынып, элге ачык эс алуу шарттары түзүлгөн. Бирок тилекке каршы, айрым пляждарда жээкти ээлеп, кол чатыр коюп алып, туристтерди мажбурлап ижара акы төлөтүп жаткан уятсыздар пайда болууда. Кол чатырдын кызматын каалабагандарга тоскоолдук жаратып, орой мамиле кылгандар да бар экен. Мындай көрүнүштөр Ысык-Көлдүн аброюна шек келтирип, туристтерди иренжитет. Жергиликтүү бийлик мындай аракеттерге эскертүү берди, эми мындан ары чара көрүлөрүн эскертебиз», — деди Орунбеков.
Ал жергиликтүү бийлик буга чара көрүп жатканын белгилеп, бардык туризм өкүлдөрүн таза, адептүү жана меймандос мамиле көрсөтүүгө чакырды.