12-августта Кара-Суу районунун Датка айыл аймагында «Саламат» санаторий-клиникасынын жаңы имаратынын курулушу башталды. Бул тууралуу президенттин аймактагы өкүлчүлүгүнөн билдиришти.
Маалыматка ылайык, иш-чарага президенттин өкүлү Элчибек Жантаев, райондук жетекчилик жана медицина кызматкерлери катышты.
Жаңы медициналык борбор 5 кабаттуу болуп, 70 орунга эсептелген. Ал заманбап медициналык жабдуулар менен камсыздалып, өз ичине операциялык блокту, толук кандуу реабилитация борборун жана билим алмашууга арналган жыйындар залын камтыйт. Долбоор ишке ашырылгандан кийин 100 жаңы жумуш орду түзүлөт.
Курулуштун жалпы сметалык баасы 300 млн сомду түзөт. Имарат пайдаланууга берилген соң аймактагы 450 миңге жакын тургун сапаттуу медициналык кызмат менен камсыздалары айтылат.