Бириккен Улуттар Уюму (БУУ) Газа секторуна 170 миң тонна гуманитардык жардам жеткирүүгө даяр экенин билдирди. Бул тууралуу БУУнун долбоорлорду тейлөө башкармалыгынын (ЮНОПС) аткаруучу директору Жоржи Морейра да Силва маалымдады.
Анын айтымында, уюмда азык-түлүк, дары-дармек жана керектүү материалдар даяр турат.
«Ок атышуулар токтогондон кийин күн сайын 100 жүк ташуучу унаа менен азык-түлүк жеткире алабыз. Мындан тышкары 1 млн литр күйүүчү май берип, алты оорукана ишке киргизебиз жана таза сууга жетүүнү жакшыртабыз», — деди ал.
Учурда БУУнун долбоорлорду тейлөө башкармалыгы(ЮНОПС) Газадагы оорукана, наабайкана жана суу түтүктөрүнүн ишин камсыз кылуу үчүн күйүүчү май жеткирүүнү улантууда.
Жоржи да Силва БАПОР агенттигинин ишин жактап, анын саламаттыкты сактоо жана билим берүүдө маанилүү роль ойноорун белгиледи. Ошондой эле уюм жакын арада 50 млн тонна калдыктарды тазалоо иштерин баштоого даярданып жатканын кошумчалады.