Айдоочулардын жолдогу агрессивдүү жүрүм-турумуна каршы жаңы чараларды караган мыйзам долбоору коомдук талкууга чыгарылды.
Бул долбоор Укук бузуулар жөнүндөгү кодекске өзгөртүү киргизүүнү сунуштайт. Документке жаңы 189-берене киргизилип, анда айдоочулардын ортосундагы чыр-чатактар, мушташтар жана башка агрессивдүү аракеттер өзүнчө жөнгө салынат.
Долбоорго ылайык:
• Жолдо мушташууга же коопсуздукка коркунуч жараткан чыр-чатакка катышкан айдоочуларга 10 000 сом айып пул салынат;
• Эгерде мындай мыйзам бузуу бир жыл ичинде кайра кайталанса, анда айдоочу 6 айга айдоочулук күбөлүгүнөн ажыратылышы мүмкүн.
Демилгечилердин айтымында, акыркы жылдары жолдогу жаңжалдар көбөйүп, кээде түздөн-түз жол үстүндө мушташка чейин жетүүдө. Бул көрүнүш башка айдоочуларга жана жөө жүргүнчүлөргө олуттуу коркунуч туудурат.