Министрлер кабинетинин төрагасы Адылбек Касымалиев өкмөт мүчөлөрүнө жана Президенттин администрациясынын кызматкерлерине кайрылып, шайлоо процесстерине аралашпоого чакырды.
Анын кайрылуусун Президенттик администрациянын маалыматтык саясат кызматынын башчысы Дайырбек Орунбеков өзүнүн Facebook баракчасында жарыялады.
“Шайлоого аралашпагыла! Эгер кимдир бирөө шайлоодо жакындарына жардам бергиси келсе, анда кызмат ордун тапшырып берип, андан кийин гана шайлоого катышсын”, — деп айтылат кайрылууда.
Белгилей кетсек, Жогорку Кеңеш 25-сентябрда өзүн өзү таркатып, президент Садыр Жапаров парламентке кезексиз шайлоону 30-ноябрга дайындаган.
Буга чейин, 28-апрелде, президент “Президентти жана Жогорку Кеңештин депутаттарын шайлоо жөнүндө” жаңы конституциялык мыйзамга кол койгон. Ага ылайык, өлкө боюнча 30 шайлоо округу түзүлүп, ар биринен үчтөн депутат шайланат. Талапкерлердин кеминде бири аял болушу шарт.