Бишкек, 31-октябрь 2025-ж. — Кыргыз Республикасынын Президенти Садыр Жапаров бүгүн өлкөнүн жогорку окуу жайларында өзгөчө жетишкендиктерге жеткен 90 студентке Президенттик стипендияны тапшырды.
Иш-чара мамлекеттик деңгээлде өткөрүлүп, билим, илим жана коомдук иштерде жигердүү болуп, жогорку көрсөткүчтөрдү жараткан студенттерге 60 000 сомдон стипендия жана Ардак грамота ыйгарылды.
Мамлекет башчы өз сөзүндө жаштардын билимге умтулуусун жана өлкөнүн өнүгүүсүнө кошкон салымын жогору баалап, мындай колдоо уланып турарын белгиледи:«Анткени кайсы тармакты алба, келечек – билимдүүлөрдүн, максат коюп, ага жете билгендердин колунда экенине турмушубузда күбө болуп, Кыргызстанда билими жетик, илими терең, ошону менен улуттук нарк-насилди урматтаган, дүйнөлүк ой жүгүртүүгө ээ жаштарга муктаж болуп турганыбызды жашырбай айтып келе жатабыз. Ошондуктан, “Бүгүнкү ийгилик – эртеңки жоопкерчилик” деп алган билимиңерди, бардык мүмкүнчүлүгүңөрдү, жигердүүлүгүңөрдү өлкөбүздүн өнүгүүсүнө арнаарыңарга бекем ишенем. Жаңы Кыргызстанды куруу жолунда адилеттүү, өнүккөн, ак ниет эмгекке негизделген мамлекетти куруу мына силердей жаштардын колунда!», — деди Садыр Жапаров.
Президенттик стипендия — бул жөн гана сыйлык эмес, жаштардын билимге, илимге жана коомдук ишмердүүлүккө болгон шыгын колдоо жана дем берүү иретинде берилет.
Бул жолу стипендияга татыктуу болгон студенттер республикадагы ар кайсы университеттерден жана адистиктерден тандалып алынды. Алардын арасында инженердик, медициналык, педагогикалык, гуманитардык жана IT тармактарында мыкты көрсөткүчтөргө жетишкен жаштар бар.
Мындай иш-чара жыл сайын өткөрүлүп, келечектеги адистерге дем берүү жана билим берүү сапатын жогорулатуу максатын көздөйт.