Бишкек шаарында жылытуу сезону 3-ноябрдан баштап расмий түрдө старт алат. Бул тууралуу шаар мэриясынан билдиришти.
Маалыматка ылайык, муниципалдык ишканалар шаардагы бардык объектилерге жылуулукту өз убагында берүүгө толук даяр. Алгач жылуулук балдар бакчаларына, мектептерге жана ооруканаларга берилет. Андан соң көп кабаттуу үйлөргө жана жеке секторго туташтырылат.
Ошол эле учурда Ош, Каракол, Токмок, Жалал-Абад жана башка шаарларда да жылытуу мезгили аба ырайынын туруксуздугуна жараша 5-10 ноябрь аралыгында башталаары маалымдалат.
Энергетика министрлигинин маалыматына караганда, республикалык деңгээлде жылытуу үчүн көмүр жана мазуттун запасы жетиштүү, жылытуу системалары алдын ала текшерүүдөн өткөн.