Бул жумада Бразилиянын Белем шаарында Бириккен Улуттар Уюмунун 30-Климаттык конференциясы (COP30) башталды. Саммитке дүйнөлүк лидерлер, илимпоздор жана эл аралык уюмдардын өкүлдөрү катышууда.
Форумдун алдында экологиялык активисттер Рио-де-Жанейродо “Планетаны булгаган төлөсүн”, “Токойлорду жана адамдарды коргоңуздар” деген чакырыктар жазылган жарык инсталляцияларды орнотушту. Алар саясатчыларды климаттын өзгөрүшүнө каршы чечкиндүү чараларды көрүүгө чакырышты.
БУУнун айлана-чөйрө боюнча программасы жарыялаган акыркы докладда, учурдагы эл аралык милдеттемелер глобалдык ысыкты токтотууга жетишсиз экени белгиленген.
Саммиттин алкагында өлкөлөрдүн жаңы климаттык аракеттер боюнча улуттук пландары жана парник газдарынын бөлүнүшүн азайтуу чаралары талкууланууда.
Белгилей кетсек, конференциянын алдынан Евробиримдик өлкөлөрү 2040-жылга чейин атмосферага зыяндуу заттарды 1990-жылдагы деңгээлге салыштырмалуу 90%га кыскартуу максатын макулдашты.