Экономикалык кызматташтык жана өнүгүү уюмунун (ОЭСР) акыркы «Социалдык байланыштар жана жалгыздык» аттуу отчетуна ылайык, дүйнө жүзүндө изоляция жана жалгыздык менен байланышкан көйгөйлөрдөн жыл сайын 800 миңден ашык адам каза болот.
Изилдөөгө ылайык, жалгыздыкка эң көп кабылуучулар — жаштар жана эркектер. ОЭСРге мүчө 21 Европа өлкөсүндө 2006, 2015 жана 2022-жылдары жакындары жана достору менен күнүмдүк жолугушуулар азайганы байкалган. Ал эми пандемиядан кийин, тескерисинче, онлайн байланыштардын интенсивдүүлүгү арткан.
2022-жылы өзүн “көбүнчө жалгыз сезген” же “дайыма жалгыз болгон” адамдардын үлүшү Францияда 11%, Литвада 9% түзгөн — бул эң жогорку көрсөткүчтөрдүн бири.
Адистердин айтымында, жалгыздык адамдын психикалык жана физикалык саламаттыгына гана эмес, анын жумуштагы өндүрүмдүүлүгүнө, билим алууну улантуу мүмкүнчүлүгүнө жана саясий активдүүлүгүнө да терс таасир тийгизет.