Кыргыз Республикасынын Президенти Садыр Жапаров бүгүн, 20-декабрда, Россия Федерациясына иш сапары менен барды. Мамлекет башчысынын учагы Санкт-Петербург шаарынын «Пулково» эл аралык аэропортуна конду.
Президентти аэропорттон Санкт-Петербург шаарынын губернатору Александр Беглов жана башка расмий өкүлдөр тосуп алышты.
Иш сапардын алкагында Кыргыз Республикасы менен Россия Федерациясынын лидерлеринин эки тараптуу жолугушуусу пландалууда. Ошондой эле Садыр Жапаров Жогорку Евразия экономикалык кеңешинин жыйынына жана Көз карандысыз Мамлекеттер Шериктештигине (КМШ) мүчө мамлекеттердин башчыларынын бейформал жолугушуусуна катышат.
Жыйындарда евразиялык экономикалык интеграциянын актуалдуу маселелери, соода-экономикалык жана финансылык кызматташтыкты тереңдетүү, каботаждык ташууларды өнүктүрүү, энергетика тармагындагы өз ара аракеттенүү, ошондой эле КМШ алкагындагы кызматташтыктын артыкчылыктуу багыттары талкууланат.
Сапардын жыйынтыгында Жогорку Евразия экономикалык кеңешинин күн тартибине ылайык тиешелүү чечимдерди жана документтерди кабыл алуу күтүлүүдө.