Тажикстандын Улуттук коопсуздук мамлекеттик комитетине (УКМК) караштуу Чек ара аскерлеринин маалыматына ылайык, 24-декабрга караган түнү Афганистан тараптан мыйзамсыз кирген террористтер менен болгон куралдуу кагылышта эки тажик чек арачысы каза болду.
Окуя Тажикстандын Шамсиддин Шохин районунда жайгашкан 0341 “Сарчашма” чек ара отрядына караштуу №5 “Сад” чек ара постунун аймагында катталган. Маалыматка ылайык, 23-декабрда саат 23:30 чамасында террористтик уюмдун үч мүчөсү мамлекеттик чек араны мыйзамсыз кесип өткөн. Алардын жайгашкан жери 24-декабрда саат 11:15те аныкталган.
Чек арачылар багынып берүүнү талап кылганда, куралчан адамдар баш тартып, каршылык көрсөтүшкөн. УКМКнын билдирүүсүндө айтылгандай, алар Тажикстандын чек ара постторунун бирине кол салууну пландап жатышкан. Жооп иретиндеги ок атышуунун натыйжасында үч террорист тең жок кылынган.
Кагылыш болгон жерден күч түзүмдөрү үч М-16 винтовкасын, бир Калашников автоматын, үн баскычтары орнотулган чет элдик өндүрүштөгү үч тапанчаны, он даана кол гранатасын, ошондой эле түнкү көрүү жабдууларын, жарылуучу заттарды жана ар кандай ок-дарыларды табышкан.
Террордук чабуулдун алдын алуу боюнча операция учурунда Зирехбон Наврузбеков жана Исматулло Курбанов аттуу эки тажик аскер кызматкери кызматтык милдетин аткарып жатып каза болушкан. Чек ара аскерлери курман болгон жоокерлердин жакындарына көңүл айтты.
Мекеме акыркы бир ай ичинде Афганистан аймагынан келген же ошол жакта жүргөн куралчан топтордун катышуусунда болгон үчүнчү куралдуу окуя экенин белгиледи. Бул учурларда жайкын тургундар же аскер кызматкерлери курман болгон.
Чек ара аскерлеринин билдирүүсүндө Афганистандагы «Талибан» кыймылынын өкмөтү чек ара коопсуздугун камсыз кылуу жана терроризмге каршы күрөшүү боюнча эл аралык милдеттенмелерин аткарбай жатканы сынга алынган.
Ошондой эле Тажикстан тарап Афганистандын учурдагы жетекчилиги эл алдында кечирим сурап, чек арадагы коопсуздукту чыңдоо боюнча натыйжалуу чараларды көрөт деген үмүтүн билдирди.
Учурда чек арадагы кырдаал туруктуу деп бааланып, окуя боюнча тергөө иштери улантылууда.