Казакстандын Транспорт министрлиги Актау шаарынын жанында кыйраган Azerbaijan Airlines (AZAL) авиакомпаниясынын учагы боюнча иликтөөнүн ортомчу жыйынтыгын жарыялады. Маалыматка ылайык, учактын борту согуштук бөлүктүн сокку уруучу элементтеринен жабыркашы мүмкүн, бирок алардын кайсы тарапка таандык экени азырынча аныкталган эмес.
Министрликтин отчетунда учактын гидравликалык тутумундагы түтүктөрдүн айрым бөлүктөрүндө тешип өткөн зыяндар бар экени айтылат. Адистердин пикиринде, бул зыяндар темир негизиндеги металл эритмесинен жасалган тышкы металл фрагменттерден пайда болушу мүмкүн. Ошол эле учурда изилденген бөтөн металл объекттеринен жарылуучу заттардын издери табылган эмес.
Иликтөө иштери али жыйынтыктала элек, бул отчет акыркы эмес экени белгиленет. Учурда адистер экипаж, учуу багыты, аба ырайы, диспетчердик кызмат жана учактын техникалык абалы боюнча бардык маалыматтарды изилдеп чыгышкан. Ошондой эле учактагы эки “кара куту” толугу менен чечмеленген — бири учуу маалыматтарын, экинчиси учкучтардын кабинасындагы сүйлөшүүлөрдү камтыйт.
Кырсык болгон аймак кылдат текшерилип, учактын сыныктарынын жайгашкан жерлери катталып, андан ары изилдөө үчүн чыгарылып кеткен. Бирок учактын техникалык тейлөө боюнча борттук компьютеринен маалымат алуу мүмкүн болгон жок. Термикалык таасирден улам борбордук техникалык компьютердин кассетасынан маалыматтарды окуу ишке ашкан эмес.
Маалыматтарды калыбына келтирүү үчүн АКШдагы Delkin Devices Inc. компаниясына кайрылуу сунушталган. Учурда казакстандык тарап америкалык компаниянын өкүлдөрү менен изилдөөнү заводдун базасында жүргүзүү боюнча сүйлөшүүлөрдү жүргүзүүдө.
Эске салсак, Embraer 190 үлгүсүндөгү AZAL учагы 25-декабрда кырсыкка учураган. Учак Баку — Грозный багыты боюнча каттам аткарып жатып, Грозный шаарына коно албай, Казакстандын Актау шаарына багыт алган. Кырсык аэропорттон 3 чакырым алыстыкта катталып, 67 жүргүнчүнүн 38и каза тапкан. Курман болгондордун арасында Азербайжан, Казакстан жана Россиянын жарандары бар.
Кырсыктан кийин ар кандай версиялар айтылган. Декабрдын аягында Азербайжандын президенти Ильхам Алиев Москва авиакырсыктын себептерин жашырууга аракет кылып жатат деп билдирген. Анын айтымында, учак радиоэлектрондук күрөш каражаттарынын таасиринен иштен чыгып, Грозныйда украин учкучсуз аппараттарына каршы ок атылып жаткан маалда учактын куйрук бөлүгү катуу жабыркаган.
Учурда бул кырсыкты иликтөө үчүн Казакстандын Транспорт министрлигинин алдында атайын комиссия түзүлүп, ага Азербайжан, Россия жана учакты чыгарган Embraer компаниясынын адистери тартылган.