Баткен облусунда 11–13-март күндөрү Жарандык коргонуунун башкаруу органдарынын катышуусунда “Өзгөчө кырдаал коркунучу жаралганда жана катталган учурда Жарандык коргонуу органдары менен күчтөрүнүн аракеттери” аттуу республикалык командалык-штабдык машыгуу өткөрүлүүдө. Бул тууралуу Кыргыз Республикасынын Өзгөчө кырдаалдар министрлиги билдирди.
Маалыматка ылайык, машыгуу 2026-жылга карата даярдык планынын негизинде уюштурулган. Өзгөчө кырдаалдар министринин орун басары Азамат Мамбетов белгилегендей, туруксуз аба ырайы жана көп жаан-чачын дарыяларда суунун деңгээлин көтөрүп, сел, суу ташкыны, кар көчкү, жер көчкү жана таш кулоо сыяктуу табигый кырсыктардын коркунучун жаратат.
Машыгуу максаты — өзгөчө кырдаалдардын алдын алуу жана кесепеттерин жоюуда түзүмдөр аралык аракеттенүүнү күчөтүү. Иш-чара мамлекеттик органдардын координацияланган ишин чыңдоого, ыкчам чечим кабыл алууга, жарандардын өмүрүн сактоого жана материалдык чыгымдарды азайтууга багытталган.