Бириккен Улуттар Уюмунун Коопсуздук кеңеши шаршемби күнү Жакынкы Чыгыштагы аскердик аракеттерди токтотууга чакырган резолюциянын долбоорун кабыл алган жок. Документ бардык тараптарды дароо аскердик аракеттерди токтотууга жана мындан ары чыңалууну күчөтпөөгө чакырып, ошондой эле жайкын тургундарга жана жарандык инфраструктурага жасалган кол салууларды айыптоону камтыган.
Резолюциянын долбоору Россия тарабынан сунушталган. Аны Россия, Кытай, Пакистан жана Сомали колдоду. Ал эми АКШ жана Латвия каршы добуш беришти, дагы тогуз мамлекет калыстыгын көрсөттү. АКШ вето укугуна ээ болгондуктан документ кабыл алынган жок.
Россиянын БУУдагы туруктуу өкүлү Василий Небензя: «Биз абдан нааразычылык билдиребиз», — деп билдирди.
Буга чейин Коопсуздук кеңеши Жакынкы Чыгыштагы азыркы кырдаал боюнча башка резолюцияны кабыл алган. Бул каатчылык АКШ жана Израиль тарабынан Иранга каршы 28-февралда жасалган аскердик соккулардан кийин жана Ирандын аймак боюнча жооп чараларынан кийин күчөгөн.
Бул документ Бахрейн тарабынан Перс булуңундагы араб мамлекеттеринин кызматташтык кеңеши атынан сунушталып, 13 добуш менен кабыл алынган, эки өлкө калыс калган.
Резолюцияда Ирандын Перс булуңундагы өлкөлөргө жана Иорданияга жасаган кол салуулары айыпталып, Тегеранды мындай аракеттерди дароо токтотууга чакырат. Документте бул аракеттер эл аралык укукту бузуу жана дүйнөлүк коопсуздукка олуттуу коркунуч катары бааланган.
Өз кезегинде Ирандын БУУдагы туруктуу өкүлү Амир Саид Иравани бул резолюцияны сынга алып: «Бул документ менин өлкөмө карата ачык адилетсиздик. Биз муну мыйзамсыз жана БУУнун уставына каршы келет деп эсептейбиз», — деген.