Президент Садыр Жапаров кечээ, 18-майда, кыргызстандыктарды Энелер күнү менен куттуктады.
«Балдарды энелик мээримге, сүйүүгө, сабырга сугарып, адамгерчиликке багыттап, каада-салтты заманбап билимге айкалыштыруу менен тарбия берип, коомдун туруктуу өнүгүшүнө зор салым кошуп келаткан аялзатын кайда болбосун бапестеп-барктап алалы. Ыйбаа кылып, сыпайы сүйлөп, жылуулук тартуулаган энелер, балдарыңыздардын кубаныч, урмат-сыйына бөлөнүп бар болуңуздар», — деген президент.
Өлкө башчы жергиликтүү кеңештердин 42%ын, Жогорку Кеңештин 22%ын, мамлекеттик кызматта иштегендердин дээрлик 44,5%ын аялдар түзүп, жогорку кызматтарда иштеп жаткандыктарын билдирген. Президент алар саясий жана коомдук турмушка бат аралашарын белгилеп, лидерлик сапаттары, өнүгүүгө дайыма умтулуусу мамлекеттүүлүктү чыңдоодо жана анын өнүгүшүндө маанилүү деп эсептээрин кошумчалаган.