Табигый дарылоо ыкмаларына болгон кызыгуунун өсүшү менен Кыргызстанда бээнин сүтү аркылуу ден соолукту чыңдоо багыты туризмдин жаңы түрү катары өнүгүп жатат.
Бул багыт көчмөн маданияттын элементтерин заманбап ден соолукту калыбына келтирүү ыкмалары менен айкалыштырат. Бээнин сүтүн ичүү сезону адатта май айында башталып, жайдын ортосуна чейин уланат.
Туризм департаментинин Туруктуу өнүктүрүү жана эл аралык кызматташтык бөлүмүнүн жетектөөчү адиси Кундуз Кутуева бул багытты өлкө үчүн өзгөчө мүмкүнчүлүк катары белгиледи.
Анын айтымында, бээнин сүтү менен дарылоо Кыргызстан үчүн улуттук бренд болуп, ден соолукту чыңдоо туризминин негизги багыттарынын бири катары эсептелет.