Кыргыз-тажик чек арасындагы Төрт-Көчө участогу нейтралдуу макамга ээ болду.
“Ортодогу полотно жолу — 10 метр, эки тараптан 15 метрден коопсуздук тилкелери болуп, жалпысынан 40 метрлик жол нейтралдуу статуска ээ болду. Ал жер тажиктердики да, кыргыздардыкы дагы эмес. Эми бул менин жолум деп эч ким тосуп ала албайт. Ушуну менен Төрт-Көчө маселеси чечилди”, — деди Камчыбек Ташиев.
Ал Төрт-Көчө боюнча “сөз көп экенин, ушуга чейинки биздин аткаминерлердин, мамлекеттик жетекчилердин жасап келген иштери чыккынчылык болгонун, кийинчерээк муну түшүндүрүп айтып берерин” кошумчалады.
Төрт-Көчө — стратегиялык маанилүү участок. Ал жерде Ош — Раззаков трассасы менен Ворух анклавынын тургундары Тажикстанга каттаган жол кесилишет. Бул жерде чек ара такталбай келген. Жаңжал чыккан маалда тажик тарап Ош — Раззаков жолун жаап келчү. Ошондуктан Баткен менен Лейлек райондорунун бир бөлүгү Кыргызстандан бөлүнүп калчу.