Үстүбүздөгү жылдын 7-апрелинде «Алтынкен» компаниясы 2010-жылдын 7-апрелинде болгон “Апрель элдик революциясынын” урматына карата иш-чара өткөрдү.
Эскерүүдө, кыргыз мамлекетинде үй-бүлөлүк-кландык башкарууга каршы күрөштө жана элдик бийликти орнотууда Апрель революциясынын катышуучуларынын эрдигин эске алып, компаниянын 2010-жылдын 7-апрелинде каза болгон кызматкерлерин эскерүү иш-чарасы болуп өттү.
«Алтынкен» компаниясынын башкармалыгынын орун басары Азамат Алиев кызматкерлер менен жолугуп, компаниянын Башкармалыгынын атынан каржылык жардам көрсөттү. Мындан тышкары, 2010-жылдагы каргашалуу окуяда курман болгондорду эскерүү үчүн азык-түлүк жана койлор берилди.
Компанияда 2010-жылдагы Апрель окуясына түздөн-түз тиешеси бар эки кызматкер бар. Анын бири лабораториянын кызматкери Динара Акматова. Ал денесинен жаракат алган. Ал эми Гүлмира Абдылдаеванын күйөөсү каргашалуу окуя учурунда каза болгон.
Иш-чаранын жүрүшүндө Азамат Алиев үй-бүлөлөргө күч-кубат, жаркын келечек каалап, мамлекетибизде тынч-тык, өсүп-өнүгүү, элибизде ынтымак болушун каалады.
Жыпара ЖЭЭНАЛИЕВА, «Кыргыз Туусу»