Кыргызстандык альпинист Асел Байбагышева дүйнөдөгү эң бийик чоку Эверестти багындырды. Бул тууралуу Кыргызстандын Альпинизм жана аскага чыгуу федерациясынын президенти Эдуард Кубатов 11-майда маалымдады.
Анын айтымында, Байбагышева Эверестке чыккан алгачкы кыргыз аял болуп, өлкө тарыхында жаңы баракты ачты. «Бул — кыргыз спорту үчүн тарыхый күн», — деди Кубатов.
Эверест деңиз деңгээлинен 8848 метр бийиктикте жайгашкан. Байбагышева сапарга 14-апрелде чыгып, 11-май күнү эртең мененки саат 9:15те чокуга жетти. Аны бул катаал жолдо альпинист Кадыр Сайдилкан коштоп жүрдү.
Сайдилкан өзүнүн билдирүүсүндө Асел Байбагышева чокуга рекорддук убакытта — 54 саатта чыкканын белгилеп, аны “Кыргыздын баатыр кызы” катары мүнөздөдү. Ал ошондой эле, 2025-жылдын сезонунда Эверестке биринчи жеткен дүйнөдөгү алгачкы аял альпинист болгонун кошумчалады.
Асел Байбагышева буга чейин Жеңиш, Хан-Теңири жана Жел-Айдар чокуларына чыккан. 2022-жылы ал Манаслу (8163 м) чокусун кычкылтексиз багындырган Кыргызстандагы алгачкы аял альпинист катары да тарыхта калган.