Өзгөчө кырдаалдар министрлиги 11-майда шашылыш билдирүү таратып, өлкөнүн айрым тоолуу жана тоо этектериндеги райондорунда сел жүрүү коркунучу бар экенин эскертти.
Маалыматка ылайык, 11-майда республиканын тоолуу аймактарында, ал эми 12-майда Ысык-Көл облусунун тоо этектериндеги айылдарында туруксуз аба ырайы жана нөшөрлүү жаан-чачын күтүлүп жаткандыктан, дарыяларда суунун деңгээли көтөрүлүп, сел жүрүшү мүмкүн.
ӨКМ жарандарды этият болууга чакырып, өзгөчө кырдаалдарга туш келсе, дароо 112 кыска номерине кабар берүүнү эскертти. Чалуу акысыз жана күнү-түнү кабыл алынат.
Эске салсак, өткөн жылдары жаз айларында өлкөнүн бир катар тоолуу аймактарында сел жүрүп, адамдар жабыркап, тургундардын мүлкү жарактан чыккан учурлар катталган.