Жусуп Баласагын атындагы Кыргыз Улуттук университетинде №4 жатакананын ордуна 16 кабаттуу заманбап имарат курулат. Бул тууралуу окуу жайдан билдиришти.
Маалыматка ылайык, жаңы комплекс студенттер жана окутуучулар үчүн дарсканалар, жатаканалар, 24/7 китепкана, амфитеатр, балдар бакчасы жана башка социалдык жайларды камтыйт.
Курулуштун жалпы наркы 1,379 млрд сомду түзүп, каражаттын бир бөлүгү университеттин өзү жана Өнүктүрүү фонду тарабынан каржыланат. Иш 1,5–2 жылга пландалган.
«Бул долбоор КУУнун 100 жылдык мааракесине карата инфраструктураны жаңыртуу программасынын алкагында ишке ашырылууда. Ал заманбап курулуш нормалары жана стандарттары эске алынуу менен иштелип чыгып, бардык колдонуучулар үчүн ыңгайлуу шарттарды камсыздоого багытталган»,— деп айтылат маалыматта.