Астана шаарында өтүп жаткан Кытай жана Борбор Азия мамлекеттеринин маалымат агенттиктеринин эл аралык медиа форумунда кыргыз делегациясы фактчекинг жанрына басым жасоо мезгил талабы экенин белгилеп, эл аралык аналитикалык борбор түзүүнү сунуштады.
Аталган медиа форумга жалпы улуттук «Кыргыз Туусу» гезитинин Социалдык саясат бөлүмүнүн башчысы Султанбек Аманбек уулу жана сайт-редактору Айгерим Качкынбекова катышууда.
«Борбор Азия өлкөлөрү менен Кытай кызматташтык жагынан жакын коңшулар болуп эсептелет. Бул жылы биз чек араларыбызды тактап, Кыргызстан ар тараптан өнүгүп жатат. Мындай позитивдүү маалыматтарды журналисттер элге жеткирүүдө. Бирок, кээ бир маалымат каражаттары такталбаган маалыматтарды таратышат. Тилекке каршы, алардын ичинде чет өлкөлүк ЖМКлар дагы бар.
Буларга каршы туруу үчүн медиа тармагында кызматташууну активдештирүүнү сунуштайм. Биргелешкен фактчекинг борборун түзүп, тажрыйба алмашуу кажет. Биргелешкен редакцияларды түзүп, позитивдүү маалыматтар менен камсыздап туралы. Келгиле биргеликте аналитикалык борбор түзөлү», — деди кыргыз делегациясынын өкүлү өз баяндамасында.