Ош шаарында жолдорду кеңейтүүдө жана каналдардын жээгин ачууда турак жайы буздурулуп жаткан адамдарга кытайлык “Кунлунь” курулуш ишканасы 520 үй куруп берет. Бул тууралуу Ош шаарынын мэриясы маалымдады.
Маалыматка ылайык, 23-июнда Оштун мэри Жеңишбек Токторбаев “Кунлунь” компаниясынын директорлор кеңешинин төрагасы Ван Чиан баштаган делегациялык топту кабыл алып, эки тараптуу кызматташуу боюнча меморандумга кол коюлду.
Ага ылайык, кытайлык ишкана Кызыл-Кыштак айылдык аймактык башкармалыгына караштуу жер тилкесине 520 үй куруп бермей болду. Оштун мэри суук түшкөнгө чейин элди көчүрүп кетүүгө жетишүү керектигин айтты. Курулуш иштери 1-июлда башталат.