Мамлекет башчы Садыр Жапаров президенттин фондунан Нарын шаарына 807 млн сом бөлдү. Бул тууралуу УКМК төрагасы Камчыбек Ташиев 25-июнда Нарын шаарында жергиликтүү бийликтин өкүлдөрү менен жолугушуу учурунда айтты.
Атайын кызматтын башчысы быйыл Нарын облусуна бюджеттен 9,4 млрд сом бөлүнгөнүн белгилеп өттү.
“Тарыхта Нарын шаарына 800 млн сом бөлүнгөн эмес”, — деди Камчыбек Ташиев.
Жакында эле социалдык тармактарга «Нарынга такыр көңүл бурулбай калды» деген билдирүүлөр чыккан. Ошондой эле Нарындык тургун бийлик жетекчилерине ыр менен кайрылган.
Ырдын мазмунунда облустагы социалдык көйгөйлөрдөн баштап, жол курулушу, жергиликтүү бийликтин элге мамилеси, башка аймактарга көңүл бурулганы менен Нарын унутта калып жатканы камтылган.
Бул окуядан кийин Камчыбек Ташиев баштаган бийлик өкүлдөрү Нарын шаарына барды. Буга чейин Президенттин Иш башкармалыгынын башчысы Каныбек Туманбаев аталган арыз-дооматтарга жооп берген.