Министрлер Кабинетинин төрагасынын орун басары Бакыт Төрөбаев Пекин шаарында Барскоон—Үчтурпан—Аксу автожолун куруу боюнча Кытайдын бир катар корпорацияларынын жетекчилери менен сүйлөшүү жүргүздү.
Маалыматка ылайык, ири корпорациялардын жетекчилери менен болгон жолугушууда Министрлер Кабинетинин Төрагасынын орун басары Бакыт Төрөбаев Кытайга болгон жумуш сапарынын максаттарынын бири Кыргызстан менен Кытайдын мамлекеттик чек арасындагы “Бедел” өткөрүү бекетине алып барчу автожолдун курулуш иштерин алдыга жылдыруу экенин билдирди.
Сүйлөшүүлөрдө курулуштун жүрүшүндө эки тарапка пайда алып келе турган жагдайлар талкууланды.
Жыйынтыгында дүйнөнүн алдыңкы объекттеринин курулушуна катышкан Кытайдын корпорацияларынан турган Кыргызстанга жакын арада Барскоон—Үчтурпан—Аксу автожолун куруу боюнча жеринде сүйлөшүү жүргүзүү үчүн делегация мүчөлөрү жөнөтүүлөрү, ошондой эле эки тараптын тиешелүү мамлекеттик органдарынын ортосунда жумушту топтор түзүлө турганы маалым болду.
Белгилей кетсек, Кытайга кирген үчүнчү жол 2024-жылдын сентябрында “Бедел” өткөрмө бекети жөнөкөйлөштүрүлгөн тартиптеги убактылуу шарттар менен ишке берилген. Учурда эл аралык стандарттарга жооп берген толук кандуу инфраструктураны түзүү этабын эки өлкө биргелешип ишке ашыруунун үстүндө иштер жүрүүдө.
Барскоон—Үчтурпан—Аксу автоунаа жолу толук кандуу ишке кирсе, Кытайдын Кыргызстан аркылуу башка мамлекеттерге болгон соода жүгүртүүсүнүн көлөмү өсүп, ал эми Кыргызстан реэкспорт кылган транзиттик мамлекетке айланары айтылат.