Англиянын түндүгүндөгү белгилүү «Робин Гуд дарагын» мас болуп кыйган эки адам — Дэниел Грэм (39) жана Адам Каррутерс (32) — 4 жыл 3 айга соттолушту. Бул тууралуу BBC жана The Guardian жазышты.
Сикамор-Гэп деп аталган 150 жылдык дарак 1991-жылы тартылган «Робин Гуд: Уурулардын ханзаадасы» фильминен кийин белгилүү болгон. Ал Адрианов валдын боюнда өсүп, миллиондогон туристтерди тарткан.
2023-жылдын сентябрында эки эркек даракты атайлап кыйып, видеого тартып интернетке чыгарышкан. Сот алардын аракетин «жогорку деңгээлде пландалган жана алдын ала даярдалган» деп сыпаттады.
Зыяны 713 миң еврого бааланган. Прокурорлор муну «акылга сыйбаган жорук» дешсе, адвокаттар «мас болгон акмактык» деп мүнөздөштү.
Белгилей кетсек, 2016-жылы бул дарак «Жылдын дарагы» наамын алган. 2024-жылы анын түбүндө жашыл өсүмдүктөр пайда болуп, тирилүү үмүтүн жараткан.