УКМКнын 9-кызматынын «Калкан» атайын багыттагы командасы “Sharp Blade-2025″ снайперлеринин эл аралык мелдешине ийгиликтүү катышты. Бул тууралуу атайын кызмат билдирди.
Маалыматка ылайык, 15-18-июль күндөрү Кытайдын Синьцзян-Уйгур автономиялуу районунун Үрүмчү шаарындагы Элдик куралдуу полиция күчтөрүнүн машыгуу базасында «Sharp Blade-2025» эл аралык снайпердик мелдеши болуп өттү. Мелдешке 25тен ашуун өлкөдөн 55тен ашуун снайпердик команда катышты.
Сынак төрт категория боюнча 12 дисциплинаны камтыды:
• негизги жогорку тактыктагы снайпердик атуу,
• типтүү тактикалык кырдаалдарда ок атуу,
• комплекстүү күжүрмөн атуу,
• алыскы аралыктан атуу.
Татаал күрөштүн жыйынтыгында КР УКМКнын 9-кызматына караштуу «Калкан» атайын багыттагы отряды өлкө намысын татыктуу коргоп, жалпы командалык эсепте 3-орунду, жуптук эсепте 2-орунду ээледи. Команданын катышуучуларынын биринин жеке ийгилиги өзгөчө сыймыктанууну жаратат: 9-кызматтын снайпери Кыргыз атайын күчтөрүнүн кесиптик даярдыгынын жогорку деңгээлин тастыктоо менен жеке биринчиликте биринчи орунду ээледи.