Түркиянын президенти Режеп Тайип Эрдоган Европа Биримдигине мүчө болуу темасын кайра жандандырып, Брюсселден интеграцияны тездетүүнү талап кылды. Бул тууралуу ал Түндүк Кипрге болгон сапардан кайтып келе жатып журналисттерге билдирди.
«Түркия — Евробиримдик үчүн акыркы мүмкүнчүлүк. Биз толук укуктуу мүчө болууга даярбыз. Европа өзгөрдү, эми артта калган саясий тоскоолдуктарды алып салып, жаңы доорду баштоого убакыт келди», — деди Эрдоган.
Анкара 25 жылдан бери ЕБге талапкер макамына ээ, бирок 2016-жылы сүйлөшүүлөр адам укуктары жана демократия жаатындагы сындардан улам токтотулган. Эрдоган азыркыга чейин ЕБ мүчөсү болгон Кипр Республикасын тааныган эмес, бул негизги тоскоол бойдон калууда.
Ошол эле маалда Эрдогандын оппоненти, мурдагы Стамбул мэри Экрем Имамоглу соттолгону жана 150дөн ашуун адам камалганы өлкөдөгү демократиялык абалга суроо жаратты. Имамоглу 2028-жылдагы шайлоодо Эрдогандын негизги атаандашы катары каралып келген.