25-сентябрда Нью-Йорк шаарында БУУнун Башкы Ассамблеясынын 80-сессиясынын жогорку деңгээлдеги жыйынынын алкагында Россиянын тышкы иштер министри Сергей Лавров БУУнун Башкы катчысы Антониу Гутерриш менен жолугушту.
Жолугушууда уюмду реформалоо маселеси жана Генсек сунуш кылган «БУУ-80» демилгеси талкууланды. Лавров өзгөрүүлөр кылдат жүргүзүлүшү керектигин, мүчө мамлекеттердин кеңири колдоосуна ээ болуусу зарылдыгын жана БУУнун негизги органдарынын ортосундагы «эмгекти бөлүштүрүү» сакталууга тийиш экенин белгиледи.
Тараптар эл аралык күн тартибиндеги эң курч маселелерди да карап чыгышты. Атап айтканда, Украинадагы кырдаал жана палестино-израилдик жаңжал боюнча пикир алмашылды. Лавров БУУнун катчылыгы бардык иштерде бейтарап жана тең салмактуу позицияны сактоого тийиш экенин эске салды.
Жыйынтыгында, эки тарап тең БУУнун дүйнөлүк иштердеги борбордук ролун жана Уставдын принциптерин сактоо зарылдыгын ырасташты. Россия уюм менен конструктивдүү кызматташууну мындан ары да улантууга даяр экенин билдирди.