Кыргыз Республикасынын Министрлер Кабинетинин Төрагасынын орун басары Эдил Байсалов Жусуп Баласагын атындагы Кыргыз улуттук университетинде өткөн «Жаңы шартдагы өз ара пайдалуу кызматташтыктын негизи катары глобалдык башкаруу демилгеси» аттуу тегерек столго катышты.
Өз сөзүндө Эдил Байсалов бул иш-чаранын өлкөбүздөгү эң байыркы жогорку окуу жайда өтүп жатканы өзгөчө мааниге ээ экенин белгиледи. Ал университет быйыл 100 жылдык мааракесин белгилеп жатканын жана Кытай элинин тарыхын, маданиятын жана тилин терең үйрөтүүчү борбор болуп саналганын эске салды.
Байсалов Кыргызстан менен Кытай Эл Республикасынын кызматташтыгы өлкөбүздүн тышкы саясатындагы артыкчылыктуу багыттардын бири экенин баса белгиледи. «Быйыл эки өлкө лидерлери үч жолу жолугушуп, бул туруктуу жана мазмундуу саясий диалогдун далили болуп жатат», – деди ал.
Ошондой эле ал ШКУнун Тяньцзин саммитинде Президент Садыр Жапаров Кытай Төрагасы Си Цзиньпиндин глобалдык башкаруу демилгесин колдоп, аны адилеттүү жана туруктуу дүйнөлүк тартипти куруудагы маанилүү салым катары баалаганын эске салды.