Кыргызстандын Улуттук статистика комитетинин аймактык органдарына 50 жаңы CHEVROLET COBALT үлгүсүндөгү автоунаа берилди. Машиналар өткөн жылы ишке кирген ата мекендик «Тулпар Моторс» заводунда чыгарылган.
Министрлер Кабинетинин Төрагасы – Президенттин Администрациясынын жетекчиси Адылбек Касымалиев автоунааларды тапшырды. Ал бул кадам экономиканын өсүшүнүн жана ата мекендик өндүрүштү колдоонун далили экенин белгиледи.
Анын айтымында, 2025-жылдын сегиз айында ИДП 1 трлн 42,1 млрд сомго жетип, реалдуу өсүш 11% деңгээлде катталган.
Жаңы автоунаалар аймактык статистика бөлүмдөрүнө жөнөтүлүп, ушул айда өтө турган айыл чарба эл каттоосунда колдонулат. Бул транспорт каражаттары статистикалык маалыматтарды чогултуудагы ыкчамдыкты жана натыйжалуулукту жогорулатары күтүлүүдө.
Ошондой эле 2026-жылы Кыргызстандын статистика органынын түзүлгөнүнө 100 жыл толору белгиленди.